Բարեգործությունը որպես բարոյական արժեք

• Սիրելի ընթերցողին

Ողջունում եմ Ձեզ «ԷԽՈ» ՀԿ պաշտոնական կայքում: Այցելելով մեր պաշտոնական կայք` Դուք կծանոթանաք մեր գործունեությանը, իրականացրած և հրատապ ծրագրերին: Ինչպես նկատում եք, փորձել ենք կայքը մատուցել նոր ձևավորմամբ և առավել հարուստ տեղեկություններով, որպեսզի ամեն ինչ պարզ և հասկանալի լինի մեր կայքի այցելուների համար: Կայքում տեղադրված նկարները և տեսահոլովակները հնարավորություն են ընձեռում Ձեզ ծանոթանալ և պատկերացում կազմել մեր կազմակերպության գործունեության մասին: Դուք ինքներդ էլ կարող եք այցեգրքում թողնել Ձեր ցանկությունները, բարեմաղթանքները և ինչու չէ նաև դիտողությունները:

Մեծագույն հարգանքներով
«ԷԽՈ» ՀԿ նախագահ`
Սերյոժա Օհանջանյան

• Ինչպես է հիմնադրվել «ԷԽՈ» ՀԿ թիմը

Մանկուց ունենալով հաշմանդամություն (ՄՈՒԿ–մանկական ուղեղային կաթված, ДЦП)` խորապես գիտակցում և պատկերացնում եմ հաշմանդամություն ունեցող անձի ծանր առօրյան, կենցաղը և դրանից ծագած բոլոր խնդիրները: Մայրս` Անժելա Օհանջանյանը, լինելով հաշմանդամ երեխայի ծնող, իր իսկ մաշկի վրա զգացել է իրեն սպասվող հետագա դժվարությունները և, այսպես ասած, փակ դռները: Ուստի նա իր իսկ ջանքերով, միավորելով հաշմանդամ երեխաների ծնողներին, 2008 թվականին նախաձեռնեց և հիմնադրեց «ԷԽՈ» հաշմանդամ երեխաներին և երիտասարդներին աջակցող հասարակական կազմակերպությունը, որի առաջնային նպատակն է հաշմանդամություն ունեցող մարդկանց իրավունքների պաշտպանությունն ու մատչելի պայմանների ապահովումը:

Մեր թիմը կայացավ, որովհետև անվերապահորեն ակտիվ մասնակցություն ունեին հաշմանդամ երեխաների ծնողները, ովքեր նվիրվել էին հանուն իրենց երեխաների: Գործունեության առանձնահատկությունը հաշմանդամ երեխաներին և երիտասարդներին հուզող բոլոր բնագավառներին հավասարապես ուշադրություն դարձնելն է, ինչպես նաև այդ ոլորտների հիմնախնդիրների լուծմանն ուղղված առավել նպատակահարմար ծրագրերի իրականացումը:

Եվ կարևորում եմ, որ այդ գործունեության հիմքում ընկած է կարգապահությունը, թափանցիկությունը, փոխադարձ հարգանքն ու կառուցվածքային հստակությունը: Առողջապահության նախարարության տվյալներով՝ Հայաստանում ապրում են մոտ 181 հազար հաշմանդամություն ունեցող մարդիկ, ովքեր ունեն բազմաթիվ առօրյա խնդիրներ` բժշկության, կրթության, իրավունքի և անգամ հանապազօրյա հացի: Քչերին կարող ենք տեսնել դպրոցներում, այգիներում, սրճարաններում կամ այլ հասարակական վայրերում` բոլորի կողքին, բոլորին հավասար:

Հույս ունենք, որ միգուցե նոր ծրագրեր կլինեն: Իշխանություններն ընդունում են, որ չեն կարողանում հատուկ պայմաններ ապահովել տարբեր տարիքային խմբերի մեջ մտնող հաշմանդամ անձանց համար, ինչպես նաև նպաստել նրանց սոցիալական ինտեգրմանը` պատճառաբանելով այս ամենը ֆինանսական միջոցների պակասով: Խնդիրները բավականին լուրջ են և նույնիսկ եվրոպական երկրներում այս տիպի խնդիրները դեռևս ամբողջովին կարգավորված չեն:

Ուստի հուսով եմ, որ «ԷԽՈ» հասարակական կազմակերպությունը հնարավորություն կտա փոխադարձ կապի միջոցով վերհանել հաշմանդամ երեխաներին և երիտասարդներին հուզող խնդիրները և փորձել միասնական ուժերով գտնել դրանց լուծման առավել արդյունավետ ճանապարհները: Սակայն հարկ եմ համարում նորից հիշատակել, որ աշխարհում ոչ մի անձ ապահովագրված չէ ո’չ հաշմանդամությունից և ո’չ էլ հաշմանդամ երեխայի ծնող դառնալուց, հետևաբար, աջակցելով հաշմանդամ երեխաներին և երիտասարդներին, յուրաքանչյուր անձ օգնում է ինքն իրեն…